![VI Tref Ślonzokow i Górali we Jankowicki Galerji Jan](/_next/image?url=https%3A%2F%2Fapi.swierklany.info%2Fwp-content%2Fuploads%2F2016%2F10%2Fsg1-1.jpg&w=3840&q=75)
VI Tref Ślonzokow i Górali we Jankowicki Galerji Jan
5 Października w Śląskiej Galerii Malarstwa Jan we Jankowicach łodboł sie niecodziynny tref Slonzokow s Góralami. Było to już VI tego typu spotkani.
Poprzedni miały miejsce we Rybniku, Nowym Targu, Łopusznej i Waksmundzie. Jak ważne som taki trefy pedzili nom p.Maria i Leszek Papieżowie, kierzi zaszczycili to spotkani. Państwo Papież byli prekursorami że tak idzie pedzieć 1 trefu we Rybnicki Biblijotyce kieryn mioł miejsce 15 maja 2007roku. VI tref łodboł sie dziynki pomocy Gminnego Ośrodka Kultury i Rekreacji we Świyrklanach. Pani Halina Karwot szefowa Ośrodka zadbała, żeby Goście s Podhala czuli sie tak jak u sia. Było coś niy yno dlo duszy, oczu ale i ciała. Podhalańczyczy na samym poczontku łobejrzeli familijno Galerjo p.Holeszow we Świyrklanach kaj Gospodyni p.Weronika Holesz połosprowiała ło całej historji powstanio tego piyknego pomnika malarstwa. Potym pojechali na tradycyjny slonski łobiod a kole 16:00 we galerji Jan łodbyło sie czytani slonskich i góralskich wierszy. Zaproszyni goście s wójtym Tomaszym Pieczkom na czele s przedstawicielkami nowotarski, rybnicki i jankowicki bibliotyki, dyrektorami miejscowych szkoł i przedstawicielkami KGW mogli usłyszeć ło potrzebie takich trefow s listu kierym przisłała p. dr.hab. Anna Mlekodaj s Podhalańskiej Pasństwowej Wyższej Szkoły Zawodowej w Nowym Targu. Jako, że ni mogła być list tyn przeczytoł we Jeji imiyniu Krzysztof Kokot. Całość uświetniły Karolinki kiere brały już w takim trefie 4 roz. Jich pieśniczka naszkryflano specjalnie na taki trefy bez Regina Sobik słowa a muzyka Adam Kuśka stała się przebojym u Podhalan. VI tref zaszczycili uczestnicy poprzednich trefow P.Stanisław Neblik i Jerzy Buczyński. P.Ewelina Kuśka laureatka Slonzoka roku s 2012r godała piykno gawynda. Było przi tym wiela uciechy bo wto jak wto ale Ewelina Kuśka umi fajnie rozprowiać po Naszymu. S gości swoji wiersze czytali: Krzysztof Kokot szef grupy podhalański znany poeta s Nowego Targu. Ciekawostkom je że p.Krzysztof to Ślonzok s pochodzynio i szkryflo po ślonsku. Pani Wanda Szado Kudasikowa kiero zrobiła tako furrora na piyrszym spotkaniu, potym czytała Renata Lipowska góralka s kwi i kości i na koniec p Adam Kwiatek kieryn debiutowoł w tym spotkaniu. Z naszych wystompili Regina Sobik kiero s Krzysztofym Kokotym bierom udział od piyrszego trefu, Urszula Oślislok i p.Elżbieta Grymel Grymlino znano nom s rybnickich Nowin kiero szkryflo rozmańte bery i bojki. Po czytaniu priszoł dran na slonski kołocz. Dłogo by trzeba jeszcze wymiyniać to co sie działo wczoraj we Galerji. Była wymiana geszynkow a Podhalańczycy przywioźli niy yno swoji tomiki ale i przepiykny łobrozki Matki Boski Ludźmierski kiero majom tak fest w zocy s dedykacjom, żeby miała nad nami łopieka. Sami niy wyjechali s pustymi rynkami bo na droga dostali niy co inszego jak ksionżka „Kulinarne Tradycje w Gminie Świyrklany” kaj mogom wyprugować wszystki maszkiety i slonski dania. Czy som potrzebne taki trefy ło tym mogom pedzieć wszyjscy Ci co tam byli. Poniży drukujymuy pieśniczka Karolinek
Pozdrowiynia
Nina Kibos
Pozdrowiynia
Hołdy czy gory jednako ważne
jak Ślązok z Góralym fest pszajom se
we Jankowicach czy Nowym Targu
pieśniczki i godka jak siostry dwie
Pszaja miłuja to samo znaczom
Czy po góralsku czy po Naszymu
trojak zbójnicki porwiom do tańca
a wtedy godka leko kożdymu
Ref ….Leć godko nasza na tref pszocieli
niyś pozdrowiynia ze swojich stron
na gory doliny wsie i miasteczka
kaj czako na nas gościnny dom
Jak kogo spotkosz to niy omijej
ośmij sie piyknie ukłoń w pokorze
opowiydz wszystkim że im pszajymy
i pozdrow gromko śląskim Szczyńść Boże
Spod grubskich kominow po same Tatry
ze szczybnych szczytow po hołdy gór
bydymy dycko sztama trzimali
zbulymy niejedyn zowistny mur
Szkryflać bydymy ło tym co boli
co serce raduje tyż fest a fest
a jak trza bydzie zatańcujymy
bo góral i ślązak pszocielym jest
Ref ….Leć godko nasza na tref pszocieli
niyś pozdrowiynia ze swojich stron
na gory doliny wsie i miasteczka
kaj czeko na nas gościnny dom
Jak kogo spotkosz to niy omijej
ośmij sie piyknie ukłoń w pokorze
opowiydz wszystkim że im pszajymy
i pozdrow gromko śląskim Szczyńść Boże
Regina Sobik